Psalms 145

Ihubo lokudumisa. ElikaDavida.

1Ngizaphakamisa wena, Nkulunkulu wami oyiNkosi;
ngizalidumisa ibizo lakho kuze kube phakade.
2Zonke insuku ngizakudumisa
ngibabaze ibizo lakho kuze kube phakade.

3Umkhulu uThixo njalo ufanele kakhulu ukudunyiswa;
ubukhulu bakhe kakho ongabulinganisa.
4Yileso laleso isizukulwane sizababaza imisebenzi yakho kwesinye;
sizatshelana ngezenzo zakho ezinkulu.
5Sizakhuluma ngenkazimulo yakho ebenyezelayo ubukhosi bakho,
lami ngizazidla ingqondo ngemisebenzi yakho emangalisayo.
6Zizalandisa ngamandla emisebenzi yakho emangalisayo,
lami ngizafakaza ngemisebenzi yakho emikhulu.
7Bazakwenza umkhosi ngokulunga kwakho okukhulu
bahlabele ngentokozo ngokulunga kwakho.

8 UThixo ulomusa njalo ulesihawu,
uyaphuza ukuthukuthela, kodwa uyanda ngothando.

9 UThixo ulungile kubo bonke;
ulesihawu kukho konke akwenzayo.
10Konke owakwenzayo kuzakudumisa, wena Thixo;
abathembekileyo bakho bazakubabaza.
11Bazalandisa ngenkazimulo yombuso wakho
bakhulume ngamandla akho,
12kuze kuthi bonke abantu bazi ngezenzo zakho ezinkulu
lokubenyezela kwenkazimulo yombuso wakho.
13Umbuso wakho ungumbuso ongapheliyo,
lobukhosi bakho bumi kuzozonke izizukulwane.

UThixo uthembekile kuzozonke izithembiso zakhe
njalo ulothando kukho konke akwenzayo.
14 UThixo uyabaxhasa bonke labo abawayo
abaphakamise bonke abacubayo.
15Amehlo abo bonke akhangela kuwe,
wena ubaphe ukudla kwabo ngesikhathi esifaneleyo.
16Uyavula isandla sakho
usuthise izidingo zakho konke okuphilayo.

17 UThixo ulungile kuzozonke izindlela zakhe
njalo uthembekile kukho konke akwenzayo.
18 UThixo useduze kulabo abacela kuye,
kubo bonke abacela kuye ngeqiniso.
19Uyagcwalisa izidingo zalabo abamesabayo;
uyezwa ukukhala kwabo abasindise.
20 UThixo uyabalinda bonke abamthandayo,
kodwa bonke ababi uzababhubhisa.

21Umlomo wami uzakhuluma ngokudumisa uThixo.
Akuthi izidalwa zonke zidumise ibizo lakhe elingcwele
kuze kube nini lanini.